«ՍԱՊԾ-ն սխալի մասին ինքնախոստովանություն է արել»
Թուրքիայից ու Պակիստանից Հայաստան ներկրվող պտուղ-բանջարեղենը պարտադիր լաբորատոր հետազոտության ենթարկելու վերաբերյալ Սննդամթերքի անվտանգության պետական ծառայության որոշումը «Իրազեկ և պաշտպանված սպառող» ՀԿ նախագահ Բաբկեն Պիպոյանը համարում է այդ կառույցի ինքնախոստովանություն, որ այսքան տարի սխալ քաղաքականություն է վարվել: Նրա համոզմամբ, ցանկացած երկրից Հայաստան ներմուծվող պտուղ-բանջարեղեն պետք է ենթարկվի լաբորատոր հետազոտության:
«Ծառայության այս հայտարարությունն ապացույց է այն բանի, որ երկար ժամանակ Հայաստանի Հանրապետություն ներկրվում է պտուղ-բանջարեղեն, որի անվտանգությունը չի ստուգվում, և սա այն դեպքում, երբ նույն ռուսական կողմը արգելում է Թուրքիայից ներմուծել պտուղ-բանջարեղեն և կա տեսակետ, որ հենց արգելված ու վտանգավոր խմբաքանակն է Հայաստան բերվում մատչելի գնով: Իսկ հիմա հարցնում եմ, ո՞վ է պատասխան տալու սխալի համար»,-Panorama.am-ին ասաց ՀԿ նախագահը:
Հիշեցնենք, որ ծառայությունը երեկ հերքեց այդ տեղեկությունները:
Հայաստանը Թուրքիայից ներմուծում է լոլիլիկ, վարունգ, կիտրոն, թուրինջ, նարինջ, նուռ, մանդարին, Պակիստանից մանդարին և այլն:
Բ. Պիպոյանի համոզմամբ, նման որոշում ծառայությունն ընդունեց միայն ջերմոցատերերի, պտուղ-բանջարեղեն արտադրողների բողոքից հետո միայն:
«Մինչ նրանց բողոքը միշտ ասել եմ, որ այսպես գործել ուղղակի չի կարելի, որովհետև դրա հետևանքները շատ բացասական են լինելու, որովհետև պտուղ-բանջարեղենի արտադրությունը, որը զարգացնելու մասին հայտարարում են, արհեստական ձևով սարքում ենք անմրցունակ, բացի այդ, ի՞նչ է նշանակում Թուրքիայից Հայաստան ներմուծել սննդամթերք առանց լիարժեք դրա անվտանգությունը ստուգելու»,-Panorama.am-ի հետ զրույցում ասաց ՀԿ նախագահը:
Պիպոյանը հիշեցնում է, որ ազգային անվտանգության բաղադրիչներից են նաև տնտեսական ու պարենային անվտանգությունը:
«Ի՞նչ է նշանակում վտանգել միանգամից անվտանգության երկու բաղադրիչ: Չի կարելի գլուխ գովալ, թե գործ են անելու, այն էլ կիսատ-պռատ: Փաստացի խոստովանում են, որ երկար տարի չեն ստուգել: Ես չեմ կարող ինքնախոստովանական քայլին դրական գնահատական տալ, խայտառակություն է: Սննդամթերքի անվտանգությունում սիրողական չի կարելի զբաղվել, ոչ պրոֆեսիոնալ գործողություններով տնտեսության հերն անիծում են»,-ասաց նա, ավելացնելով, որ շուկայում պետք է ներմուծված ու տեղական արտադրության պտուղ-բանջարեղենը տարբերակված լինեն:
ԳՆ Սննդամթերքի անվտանգության պետական ծառայությունից Panorama.am-ին խոստացան պատասխանել, թե ինչու է այս պահին նման որոշում ընդունվել և ինչո՞ւ է այն վերաբերում հենց այդ երկու երկրից ներկրվող պտուղ-բանջարեղենի վրա:
Թեմայի վերաբերյալ կարդացեք նաև՝
Ջերմոցային տնտեսություն ենք զարգացնում, բայց հարևաններից մեծ քանակությամբ լոլիկ ու վարունգ ենք ներմուծում
Չգիտենք, որտեղ արտադրված բանջարեղենն ենք ուտում
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
